پاکستان نے بدھ کے روز ایٹمی صلاحیت کے حامل زمین سے زمین تک مار کرنے والے بیلسٹک میزائل غزنوی کا کامیاب تجربہ کیا ہے۔

فوج کے شعبہ تعلقات عامہ کے مطابق بیلسٹک میزائل 290 کلومیٹرز تک ایٹمی اور روایتی ہتھیار لے جانے کی صلاحیت رکھتا ہے۔یہ تجربہ آرمی سٹرٹیجک فورسز کمانڈ کی آٹھویں فیلڈ تربیتی مشقوں کے دوران کیا گیا۔کمانڈر آرمی سٹرٹیجک فورسز کمانڈ لیفٹیننٹ جنرل محمد علی سٹرٹیجک پلان ڈویژن کے اعلی افسران اور سٹرٹیجک اداروں کے سائنسدانوں اور انجینئرز نے تجربہ کا مشاہدہ کیا۔آرمی سٹرٹیجک فورسز کمانڈ کے کمانڈر نے پیشہ وارانہ تیاریوں اور ہتھیاروں کے نظام کو فعال بنانے کیلئے شاندار معیار پیش کرنے کی تعریف کی۔صدر، وزیراعظم اور تینوں مسلح افواج کے سربراہان نے کامیاب تجربہ کرنے پر سائنسدانوں انجینئروں اور آرمی سٹرٹیجک فورسز کمانڈ کے تمام شعبوں کو مبارکباد دی ہے۔