بھارت کے غیر قانونی زیر قبضہ جموں وکشمیر میں کل جماعتی حریت کانفرنس نے کہا ہے کہ نریندر مودی کی فسطائی بھارتی حکومت کی ظالمانہ پالیسی کے تحت کشمیری صحافیوں کے خلاف کالے قوانین کے تحت مقدمات دائر کیے جارہے ہیں تاکہ قابض بھارتی فورسز کی طرف سے کشمیریوں کے خلاف جاری جنگی جرائم سے عالمی برادری کو بے خبر رکھاجاسکے ۔

کل جماعتی حریت کانفرنس کے جنرل سیکرٹری مولوی بشیر احمد نے آج سرینگرمیں جاری ایک بیان میں کہا کہ 1989 سے اب تک مقبوضہ علاقے میں اپنے پیشہ وارانہ فرائض کی ادائیگی پرمتعدد صحافیوں کو قتل، بیسیوں کو زخمی، اغوا اور تشدد کا نشانہ بنایا گیا۔جموںوکشمیر مسلم کانفرنس کے چیئرمین شبیر احمد ڈار نے سرینگر سے جاری ایک بیان میں کہا کہ کشمیری بھارتی فوجیوں کی طرف سے قتل عام ، آبروریزی، املاک کی تباہی اور عبادت گاہوں کی بے حرمتی کے واقعات کے ہرگز فراموش نہیں کر سکتے۔ انہوں نے بھارت پر زور دیا کہ وہ جموں وکشمیر کے بارے اقوام متحدہ کی قراردادوں کا احترام کرے۔جموں وکشمیر نیشنل پنتھرز پارٹی کے کارکنوں نے مودی حکومت کی ظالمانہ کارروائیوں کے خلاف جموں میں احتجاجی مظاہرہ کیا۔ مظاہرین کی قیادت ہرش دیو سنگھ نے کی ۔ مظاہرین نے کشمیریوں پر عائد کیے جانے والے ظالمانہ ٹیکسوں ، بڑھتی ہوئی مہنگائی اور پٹرول کی قیمتوں میں اضافے کی مذمت کی