بینظیر انکم سپورٹ پروگرام بے نظیر نشوونما پروگرام کے تحت اب تک غذائی قلت سے متاثر دولاکھ سینتالیس ہزار بچوں، دولاکھ اکتیس ہزار حاملہ اور دودھ پلانے والی خواتین کو مالی مدد فراہم کرچکا ہے۔ بی آئی ایس پی کے ایک عہدیدار کے مطابق پروگرام سے مستفید ہونیوالے ان افراد کو ملک بھر کے چار سو سے زائد نشوونما مراکز کے نیٹ ورک سے مدد فراہم کی گئی ہے۔ بے نظیر نشوونما پروگرام کی مشروط نقد رقم کی منتقلی کے تحت بی آئی ایس پی سے مستفید ہونیوالے خاندانوں کو فی سہ ماہی ہر بچے کی والدہ کو فی کس دوہزار اور ہر لڑکی کی والدہ کو فی کس پچیس سو روپے فراہم کئے جاتے ہیں۔ اعداد و شمار کے مطابق غذائی قلت کی بلند شرح کے لحاظ سے پاکستان کا خطے میں دوسرا نمبر ہے۔