وزیراعظم شہبازشریف نے سیلاب سے متاثرہ افراد کی مدد اور بحالی کے لئے پاکستان سے بھرپور تعاون کرنے پر سعودی عرب کی قیادت اور لوگوں کا شکریہ ادا کیا ہے۔

انہوں نے یہ بات پاکستان میں سعودی عرب کے سفیر نواف سعید المالکی سے گفتگو کرتے ہوئے کہی جنہوں نے آج (منگل)اسلام آباد میں ان سے ملاقات کی۔وزیراعظم نے خادمین حرمین شریفین سلمان بن عبدالعزیز السعود اور ولی عہد محمد بن سلمان کے لئے نیک خواہشات کا پیغام دیا۔وزیراعظم نے ولی عہد کے ساتھ ٹیلی فون پر اپنی حالیہ گفتگو کے بارے میں یاد دلایا اور کہا کہ دونوں کی مشترکہ خواہش ہے کہ مختلف شعبوں میں دوطرفہ تعاون مزید مستحکم ہو۔وزیراعظم نے دوطرفہ تعلقات مثبت سمت میں آگے بڑھنے کے عمل کو برقرار رکھنے کے لئے مختلف شعبوں میں دوطرفہ تبادلوں کے تسلسل کی اہمیت پر زور دیا۔شہبازشریف نے امدادی کوششوں میں سعودی عرب کے سفیر کے اہم کردار کو بھی سراہا جنہوں نے خود سیلاب سے متاثرہ علاقوں کا دورہ کیا۔