وزیر اعظم عمران خان نے ٹیکس نظام میں کی جانے والی اصلاحات کی کوششوں پر اطمینان کا اظہار کرتے ہوئے متعلقہ حکام کو ہدایت کی ہے کہ وہ کاروباری برادری کو زیادہ سے زیادہ سہولیات کی فراہمی کو یقینی بنائیں۔ انہوں نے یہ ہدایات کاروباری عمل کو بہتر بنانے کیلئے منعقدہ اجلاس کی صدارت کرتے ہوئے دیںجس میں مختلف ترجیحاتی شعبوں خاص طور پر چھوٹے اور بڑے کاروباراور ملک میں خصوصی ٹیکنالوجی زونز کا قیام شامل ہے۔اجلاس کے دوران وزیر اعظم نے وفاقی اور صوبائی حکومتوں کی جانب سے کاروبا ر کو آسان بنانے کے حوالے سے پیش رفت کو سراہا ۔انہوں نے ہواوے اور سام سنگ جیسی بڑی کمپنیوں کو پاکستان میں آپریشنز شروع کرنے کی ترغیب دینے پر خصوصی ٹیکنالوجی زونز اتھارٹی کی کوششوں کو سراہا۔وزیر اعظم نے زور دیا کہ ملک کے دیگر بڑے شہروں کے ساتھ ساتھ آزاد کشمیر اور بلوچستان میں بھی خصوصی ٹیکنالوجی زونز کے قیام پر بھی یکساں توجہ دی جائے۔