صدرمملکت ڈاکٹر عارف علوی نے ٹیکس چوری کی روک تھام کے لئے جدید ترین ٹیکنالوجی کے استعمال کی ضرورت پر زور دیا ہے۔آج اسلام آباد میں ٹیکس دہندگان کے لئے آگہی سیمینار سے خطاب کرتے ہوئے انہوں نے کہا کہ ٹیکس چوری ملک کے لئے زہر ہے اور اس کی وجہ بدعنوانی ہے جس سے قوم ناکام ہوجاتی ہے۔صدر نے زور دیا کہ ملک کے معاملات چلانے کے لئے ٹیکس ادائیگی ناگزیر ہے۔انہوں نے کہا کہ ہماری ٹیکس ٹو جی ڈی پی کی شرح تقریباً دس فیصد ہے جو کہ دنیا کے دیگر ممالک کے مقابلے میں انتہائی کم ہے۔ انہوں نے کہا کہ یہی وجہ ہے کہ ہمیں قرضے لینے پڑتے ہیں۔انہوں نے افسوس کا اظہار کرتے ہوئے کہا کہ لوگوں میں ٹیکس ادائیگی کے جذبے کی کمی ہے اور وہ ٹیکس نہ ادا کرنے کے لئے مختلف بہانے پیش کرتے ہیں۔صدر عارف علوی نے کہا کہ اہل افراد کو ٹیکس کے دائرہ کار میں لانے کے لئے ایف بی آر اور نادرا کے پاس اعداد و شمار موجود ہیں۔ انہوں نے کہا کہ نظام میں خامیوں کا بھی حل نکالنا ہوگا۔