امورکشمیروگلگت بلتستان کے لئے وزیراعظم کے مشیرقمرزمان کائرہ نے کہاہے کہ بھارت وادی میں جی ٹونٹی کانفرنس کے انعقاد کے ذریعے بھارت کے غیرقانونی زیرقبضہ جموں وکشمیرمیں انسانی حقوق کی بدترین صورتحال کونہیں چھپاسکتا۔باغ کے دورے کے موقع پر اے پی پی سے گفتگو کرتے ہوئے انہوں نے سرینگرمیں جی ٹونٹی کانفرنس منعقد کرنے پر بھارت کوآڑے ہاتھوں لیااورکہاکہ بھارت اپنے مذموم مقاصد کے لئے دنیا کوگمراہ کررہاہے۔قمرزمان کائرہ نے کہاکہ پاکستان کے دوست اور جی ٹونٹی ممالک سے رابطوں کے نتائج نکلے اورمتعددممالک نے اس کانفرنس میں شرکت نہیں کی۔انہوں نے دوٹوک انداز میں کہاکہ پاکستان متنازعہ علاقے میں بھارت کی طرف سے جی ٹونٹی کانفرنس کے انعقاد کامخالف ہے۔