عراق نے پاکستانی زائرین کو بہترین سہولیات کی فراہمی کیلئے مکمل تعاون کی یقین دہانی کا اعادہ کیا ہے۔
ان خیالات کااظہار آج اسلام آباد میں عراق کے سفیر حامد عباس لفتہ نے وزیرداخلہ محسن نقوی اور بیرون ملک مقیم پاکستانیوں اور مذہبی امور کے وزیر چوہدری سالک حسین کے درمیان ملاقات میں کیا۔
انہوںنے عراق کا دورہ کرنے والے پاکستانی زائرین کو زیادہ سے زیادہ سہولیات کی فراہمی پرتبادلہ خیال کیا ۔
انہوں نے پاکستانی زائرین کیلئے ویزے کے بغیر داخلے اوران کا کوٹہ بڑھانے پر بھی بات چیت کی ۔
وزیرداخلہ نے اس موقع پر گفتگو میں کہاکہ حکومت کا مقصد زائرین کو تمام ممکنہ سہولیات فراہم کرنا ہے ۔
انہوں نے کہاکہ ویزا کے بغیر داخلے کی اجازت سے زائرین کو سہولت ملے گی۔ انہوں نے اس سال پاکستانی زائرین کا کوٹہ دوگنا کرنے کی بھی گزارش کی ۔
ملاقات کے دوران سفارتی اور سرکاری پاسپورٹوں پرویزا کے استثنیٰ کے معاہدے کو فوری طورپر حتمی شکل دینے پر اتفاق کیاگیا۔
انہوں نے بیرون ملک مقیم پاکستانیوں کی وزارت اور عراق کی وزارت محنت کے درمیان مفاہمتی یادداشت پردستخط کرنے پر بھی اتفاق کیا۔