پاکستان نے جنوبی افریقہ کو گزشتہ رات کیپ ٹاون میں کھیلے گئے دوسرے بین الاقوامی ایک روزہ کرکٹ میچ میں اکاسی رنز سے شکست دیکر تین میچوں کی سیریز دوصفر سے جیت لی ہے۔

پاکستان نے پہلے بیٹنگ کرتے ہوئے انچاس اعشاریہ پانچ اوورز میں تمام وکٹوں کے نقصان پرتین سو انتیس رنز بنائے۔

جواب میں جنوبی افریقہ کی ٹیم تینتالیس اعشاریہ ایک اوورز میں دو سو اڑتالیس رنز بنا کر آوٹ ہوگئی۔

تیسرا اور آخری میچ اتوار کو جوہانسبرگ میں کھیلا جائے گا۔

وزیراعظم شہبازشریف نے پاکستان کرکٹ ٹیم کو جنوبی افریقہ کے خلاف ون ڈے سیریز جیتنے پر مبارکباد دی ہے۔

انہوں نے اپنے ایک بیان میں کھلاڑیوں' کوچز' چیئرمین پاکستان کرکٹ بورڈ اور بورڈ کے عہدیداروں کی محنت کو سراہا۔

انہوں نے کہا کہ پاکستان کرکٹ ٹیم نے سخت محنت اور اپنی غلطیوں سے سبق سیکھ کر شاندار کامیابی حاصل کی۔