ملک بھر میں ماہ رمضان کا آخری جمعہ ''جمعتہ الوداع'' آج مذہبی عقیدت و احترام کے ساتھ منایا گیا۔
نمازِ جمعہ کے اجتماعات میں پاکستان کی ترقی وخوشحالی اور امت مسلمہ کے اتحاد یکجہتی کیلئے خصوصی دعائیں کی گئیں۔
علماء اور آئمہ کرام نے جمعہ کے خطبات میں جمعتہ الوداع اور ماہِ صیام کی اہمیت پر روشنی ڈالی۔
رواں سال جمعتہ الوداع اور ستائیس رمضان المبارک ایک ہی روز آئے ہیں جسے نہایت بابرکت تصور کیا جا رہا ہے۔
ادھر مظلوم فلسطینیوں سے اظہار یکجہتی کیلئے آج یوم القدس منایا گیا۔
قانون نافذ کرنے والے اداروں نے ملک بھر میں جمعتہ الوداع اور یوم القدس کے جلوسوں کے سلسلے میں سخت حفاظتی انتظامات کئے تھے۔
اسلام آباد میں ایران کے سفارتخانے نے فلسطینیوں سے پاکستان کے اظہار یکجہتی کی تعریف کی۔
