وفاقی وزیر برائے اقتصادی امور احد خان چیمہ کی زیر صدارت وزارت اقتصادی امورمیں ای ڈی سی ایف پروگرام کے لیے اجلاس ہوا۔

اجلاس میں ای ڈی سی ایف پراجیکٹ مینجمنٹ کنسلٹنٹ کے اراکین، وزارت اقتصادی امور کے سینئر افسران اور دیگر اہم سٹیک ہولڈرز نے شرکت کی۔

وزیر اقتصادی امور نے وفد کا گرمجوشی سے استقبال کیا اور ایگزم بینک اور جمہوریہ کوریا کی حکومت کی جانب سے فراہم کی جانے والی مسلسل حمایت پر شکریہ ادا کیا۔

وفاقی وزیر نے شرکا اجلاس کو بتایا کہ سات جاری منصوبے جو کل 522ملین ڈالرمالیت کے ہیں، مختلف اہم شعبوں میں نافذ کیے جا رہے ہیں، جن میں سڑکوں کا بنیادی ڈھانچہ، اطلاعاتی ٹیکنالوجی، اور صحت شامل ہیں۔

انہوں نے ایگزم بینک کی جانب سے فریم ورک انتظام (26-2022) پر دستخط کرنے پر بھی شکریہ ادا کیا اور امید ظاہر کی کہ اس معاہدے کے تحت ایک ہزارملین ڈالر کے مکمل استعمال کی امید ہے۔

مزید برآں اجلاس کو یہ بھی بتایا گیا کہ 10 منصوبے جو زیر عمل ہیں، ان کی معلومات پہلے ہی ای ڈی سی ایف کے ساتھ شیئر کی جا چکی ہیں اور ان کے جلد نفاذ کی توقع ہے۔

وفاقی وزیر نے مشن کو آگاہ کیا کہ درمیانی مدت کے منصوبوں کی منصوبہ بندی کے سلسلے میں وزارت نے اطلاعات اور مواصلات کی ٹیکنالوجی، ماحولیاتی تبدیلی، تعمیرات اور ٹرانسپورٹ جیسے اہم شعبوں میں نئے منصوبوں کی نشاندہی کی ہے۔

 وفاقی وزیر احد خان چیمہ نے پاکستان کی حکومت کے ای ڈی سی ایف کے ساتھ تعاون کو مضبوط بنانے کے عزم کو دہرایا اور اعتماد کا اظہار کیا کہ منصوبوں کی تیاری اور نفاذ میں بہتری کے ساتھ، دونوں ممالک اپنے تعاون کی مکمل صلاحیت حاصل کر سکتے ہیں۔