بحری امور کے وزیر قیصر احمد شیخ نے کوریا کی حکومت اور سرمایہ کاروں کو پاکستان کی بندرگاہ اور جہاز رانی کی صنعت میںسرمایہ کاری کے مواقع تلاش کرنے کی دعوت دی ہے۔

وہ اسلام آباد میں پاکستان میں کوریا کے سفیر پارک کی جون سے ملاقات کے دوران گفتگو کررہے تھے ۔وفاقی وزیر نے کہا کہ متحدہ عرب امارات، سعودی عرب، ڈنمارک اور ملائیشیا جیسے ممالک پہلے ہی پاکستان کی بندرگاہوں میں نمایاں سرمایہ کاری کر چکے ہیں۔ انہوںنے امیدظاہر کی کہ کوریا کے سرمایہ کار بھی اس موقع

سے استفادہ کریں گے۔قیصر احمد شیخ نے کئی دیگر شعبوں میں بھی دوطرفہ تعاون کو مضبوط کرنے پر زوردیا جن میں قابل تجدید توانائی، شمسی، ہوا، پن بجلی، شہری منصوبہ بندی اور نقل و حمل کے منصوبے شامل ہیں۔

انہوںنے دونوں ممالک کے درمیان موجودہ تعلیمی تبادلوں کے پروگراموں کو بھی سراہا۔

وفاقی وزیرنے کلیدی شعبوںمیں کوریا کے ساتھ شراکت کے لئے پاکستان کے عزم کا اعادہ کیا جس کا مقصد دونوں ممالک کے لئے باہمی طورپر مفید شراکت داری کو قائم کرنا ہے۔