وزیراعظم شہباز شریف نے یقین ظاہر کیا ہے کہ سعودی عرب کے وفد کے دورے کی وجہ سے پاکستان میں اربوں ڈالرز کی سرمایہ کاری آئے گی۔

انہوں نے آج اسلام آباد میں کابینہ کے اجلاس کی صدارت کرتے ہوئے کہا کہ سعودی وفد نے سعودی ولی عہد شہزادہ محمد بن سلمان کی خصوصی دلچسپی کے باعث پاکستان کا دورہ کیا۔

وزیراعظم نے سعودی ولی عہد کے دورے کا شکریہ ادا کیا اور سعودی وفد کے دورے کو کامیاب بنانے میں وفاقی کابینہ اور متعلقہ اداروں کے کردار کو بھی سراہا۔شہباز شریف نے کہا کہ سعودی وفد پاکستانی وزراء اور حکام کی تیاریوں اور مہمان نوازی سے بہت متاثر ہوا اور سعودی وزیر خارجہ فیصل بن فرحان السعود نے بھی اس کی تعریف کی۔وزیراعظم نے ملک میں سعودی سرمایہ کاری آنے اور منصوبوں کی تکمیل یقینی بنانے کیلئے اسی جوش و جذبے کے اظہار کی ضرورت پر زور دیا۔انہوں نے پاکستان کی تعمیر و ترقی کیلئے تمام کوششیں بروئے کار لانے کے عزم کا بھی اعادہ کیا۔