پاکستان نے نیدر لینڈ کے شہر دِی ہیگ میں پاکستان سمیت اسلامی تعاون تنظیم کے کچھ رکن ممالک کے سفارتخانوں کے سامنے قرآن پاک کی بے حرمتی کی حالیہ احمقانہ اورا نتہائی مجرمانہ کارروائی کی شدید مذمت کی ہے۔ دفترخارجہ کی ترجمان ممتاز زہرہ بلوچ نے ایک بیان میں کہا کہ یہ سوچی سمجھی اشتعال انگیز اور اسلام دشمن کارروائی ہے جس سے دنیا بھر کے مسلمانوں کے جذبات مجروح ہوئے ہیں۔ انہوں نے کہا کہ اظہار رائے کی آزادی اور احتجاج کے حق کی آڑ میں اس طرح کی کارروائی کو برداشت نہیں کیا جائے گا۔ ترجمان نے کہا یہ ضروری ہے کہ بین الاقوامی برادری اسلام مخالف پروپیگنڈے کے خلاف آواز اٹھائے اور بین المذاہب ہم آہنگی کے فروغ کیلئے مل کر کام کرے۔انہوں نے کہا کہ اقوام متحدہ کی جنرل اسمبلی کی طرف سے 15 مارچ کو اسلام فوبیا کے خلاف 2022 میں عالمی دن منانے کے اعلان کے پیچھے یہ ہی جذبہ کارفرما تھا۔