منصوبہ بندی کے وزیر احسن اقبال کی زیر صدارت اسلام آباد میں اجلاس منعقد ہوا جس میں بلوچستان میں مختلف ترقیاتی منصوبوں پر کام کی رفتار کا جائزہ لیا گیا۔

اجلاس میں کچی کینال فیز ٹو کے منصوبے پر تفصیلی غور کیا گیا اور پاکستان انسٹی ٹیوٹ آف ڈویلپمنٹ اکنامکس کی اراضی کے معاملے ، علامہ اقبال یادگار اور اقبال لائبریری سے متعلق امور کا جائزہ لیا گیا۔

اجلاس میں لورا لائی اور ژوب کو ملانے والی 35 کلو میٹر طویل شاہراہ کے منصوبے کی تکمیل کا بھی جائزہ لیا گیا۔

کچی کینال منصوبے پر گفتگو کرتے ہوئے وفاقی وزیر نے کہا کہ منصوبے میں تعمیراتی معیار پر کسی صورت سمجھوتہ نہیں کیا جائے گا۔

انہوں نے ہدایت کی کہ حکومت بلوچستان کو تمام دستیاب آپشنز پر اعتماد میں لیا جائے۔

وفاقی وزیر نے متعلقہ حکام کو تمام منصوبوں پر پیشرفت تیز کرنے اور وزیراعظم کی ہدایات پر مقررہ مدت میں عملدرآمد یقینی بنانے کی ہدایت کی۔