وزیراعظم محمد شہبازشریف نے پاکستان اور متحدہ عرب امارات کے درمیان بہترین سیاسی تعلقات کو باہمی طور پر فائدہ مند اقتصادی شراکت داری میں تبدیل کرنے کی پاکستان کی خواہش کا اعادہ کیا ہے۔
وہ اسلام آباد میں متحدہ عرب امارات کے نائب وزیراعظم و وزیر خارجہ شیخ عبداللہ بن زاید آل نھیان سے بات چیت کرہے تھے ۔
وزیراعظم نے پاکستان اور متحدہ عرب امارات کے درمیان مشترکہ تاریخ اور باہمی احترام کے ساتھ ساتھ مضبوط ثقافتی اور اقتصادی روابط پر مبنی برادرانہ تعلقات کو مزید مستحکم بنانے کے عزم کا اعادہ کیا۔
انہوں نے متحدہ عرب امارات کے صدر اور ابوظہبی کے حکمران شیخ محمد بن زاید النہیان کے لئے نیک خواہشات کا اظہار کیا اور مختلف شعبوں میں متحدہ عرب امارات کی پاکستان کے لیے مسلسل حمایت کو سراہا۔
دونوں ممالک کے درمیان دوطرفہ تعاون کی مثبت رفتار پر اطمینان کا اظہار کرتے ہوئے وزیراعظم نے تجارت، سرمایہ کاری، توانائی اور عوامی روابط میں تعاون بڑھانے کی ضرورت پر زور دیا۔
ملاقات میں علاقائی صورتحال اور عالمی سطح پر ہونے والی پیشرفت کا جائزہ بھی لیا گیا۔
اس موقع پر شیخ عبداللہ بن زاید النہیان نے متحدہ عرب امارات میں پاکستانی برادری کے کردار کو سراہا اور دوطرفہ تعلقات کو مزید مضبوط بنانے اور تعاون کی نئی راہیں تلاش کرنے کے لئے اپنے ملک کے عزم کا اعادہ کیا۔
