غیرقانونی طورپر بھارت کے زیر قبضہ جموں وکشمیرمیں کل جماعتی حریت کانفرنس نے کہا ہے کہ مودی کی قیادت میں بھارتی حکومت کے حالات معمول پرآنے کے دعوئوں سے زمینی حقائق کو چھپایا نہیں جاسکتا کیونکہ مقبوضہ جموں و کشمیر میں ظلم وجبر کاسلسلہ آج بھی جاری ہے۔
کل جماعتی حریت کانفرنس کے ترجمان ایڈووکیٹ عبدالرشید منہاس نے سرینگر میں ایک بیان میں معصوم شہریوں کے قتل وغارت پر گہری تشویش کا اظہار کیا۔
انہوں نے افسوس ظاہر کیا کہ صورتحال خاص طور پر حالیہ انتخابات کے بعدمزید خراب ہوئی ہے جن کو مودی حکومت نے مسئلہ کشمیر کے حل کے طور پر پیش کیاتھا۔
ایڈوکیٹ منہاس نے کہاکہ کشمیری عوام کی تحریک حق خودارادیت کو دبانے کیلئے ماورائے عدالت قتل، جبری گمشدگیوں،جعلی مقابلوں اور دیگر ظالمانہ ہتھکنڈوں سمیت انسانی حقوق کی خلاف ورزیوں میں خطرناک حد تک اضافہ ہوا ہے۔
انہوں نے انسانی حقوق کی عالمی تنظیموں سے مطالبہ کیا کہ وہ بھارتی فوجیوں کی طرف سے کشمیریوں پر ڈھائے جانے والے مظالم کوروکنے کیلئے فوری اقدامات کریں۔
