بلوچستان کے وزیراعلیٰ میر سرفراز بگٹی نے کہا ہے کہ آخری دہشت گرد کے خاتمے تک دہشت گردوں کے خلاف جنگ جاری رکھی جائے گی۔
وہ آج کوئٹہ میں ویڈیو لنک کے ذریعے قومی میڈیا کے اینکرز اور سینئر صحافیوں سے گفتگو کر رہے تھے۔
وزیراعلیٰ نے کہا کہ سکیورٹی فورسز مشکل حالات میں بے مثال خدمات انجام دے رہی ہیں۔
اس سے قبل بلوچستان کے وزیراعلیٰ سیکرٹریٹ میں صوبے کے سماجی و اقتصادی شعبوں، معدنیات و کان کنی اور امن و امان کے حوالے سے اہم بریفنگز دی گئیں۔
وزارتِ منصوبہ بندی و ترقی کی بریفنگ کے مطابق بلوچستان کی سماجی و اقتصادی ترقی کے لیے صوبائی حکومت کی اہم حکمتِ عملی پر تفصیلی غور کیا گیا۔ بریفنگ میں گورننس، عوامی خدمات کی فراہمی، فنڈز کے موثر استعمال اور اس بات کو یقینی بنانے کے اقدامات کو اجاگر کیا گیا کہ ترقیاتی منصوبوں کے ثمرات عوام تک پہنچیں۔
ایک اور بریفنگ میں بلوچستان کے معدنیات اور کان کنی کے شعبے کی استعداد اور جاری منصوبوں کی تفصیلات سے آگاہ کیا گیا۔ بتایا گیا کہ معدنی شعبے کو ترقی دینے اور اس بات کو یقینی بنانے کے لیے مختلف اقدامات کیے جا رہے ہیں کہ بلوچستان کے عوام صوبے کے معدنی وسائل سے مستفید ہوں۔
محکمہ داخلہ و قبائلی امور نے صوبے میں امن و امان کی صورتحال بہتر بنانے کے لیے کیے جانے والے اقدامات پر تفصیلی بریفنگ دی۔ اس میں صوبائی ایکشن پلان، پولیس اصلاحات اور بالخصوص لیویز فورس کو پولیس فورس میں ضم کرنے کے اقدامات شامل تھے۔
