وزیراعظم محمد شہباز شریف نے گندم کے کاشتکاروں کیلئے خصوصی پیکیج کا اعلان کرنے پر وزیراعلیٰ پنجاب مریم نواز کو سراہا ہے۔

اپنے ایک بیان میں انہوں نے کہا کہ ساڑھے 5 لاکھ کاشت کاروں کیلئے براہ راست گندم سپورٹ فنڈ کے تحت 15 ارب روپے کے فنڈز کی منظوری انتہائی خوش آئند ہے ۔

انہوں نے کہا کہ پنجاب میں گندم کے کاشتکاروں کیلئے آبیانہ اور فکس ٹیکس میں بھی چھوٹ کاشتکاروں کیلئے بڑی سہولت ہے۔

انہوں نے کہا کہ کسانوں کو چار ماہ تک مفت سٹوریج کی سہولت مہیا کرنے کے اقدام سے گندم کو موسمی اثرات اور کسانوں کومنڈی کے دبائو سے محفوظ رکھنے میں آسانی ہوگی۔

وزیراعظم نے یقین دلایا کہ گندم اوراس سے تیار شدہ اشیاء کی برآمد میں وفاقی حکومت، حکومت پنجاب سے مکمل تعاون کرے گی۔