جمہوریہ کرغزستان میں پاکستان کے سفیر حسن ضیغم نے کہا ہے کہ پاکستان کا سفارتخانہ بشکیک میں ہجوم کی طرف سے حالیہ تشدد واقعے کے بعد پاکستانی شہریوں کو درپیش مسائل حل کرنے کیلئے سرگرم عمل ہے۔
انہوںنے یہ بات جمہوریہ کرغزستان میں پاکستانی طلبہ کی موجودہ صورتحال اور پاکستانی سفارتخانے کی جانب سے ان کی مدد کیلئے اٹھائے گئے اقدامات کے حوالے سے ایک وڈیو بیان میں کہی۔
انہوں نے کہا کہ بشکیک میں پاکستانی مشن نے اب تک ہنگامی ٹیلی فون نمبروں پر موصول ہونے والی پانچ سو سے زائد فون کالز کا جواب دیا ہے۔
سفیر نے بتایا کہ بعض مقامی انتہا پسند عناصر نے بشکیک میں بین الاقوامی طلباء کے ہاسٹلز اور نجی رہائش گاہوں کو نشانہ بنایا۔
کرغزستان کی حکومت کے مطابق تشدد کے واقعات میں چودہ غیر ملکی زخمی ہوئے ہیں۔
کرغز حکام نے معاملے کی تحقیقات شروع کردی ہیں اور چند مشتبہ افراد کو گرفتار بھی کیا گیا ہے۔
سفیر حسن ضیغم نے کرغزستان میں پاکستانی برادری پر زور دیا ہے کہ وہ سوشل میڈیا پر گردش کرنے والی جعلی خبروں پر یقین کرنے سے گریز کریں۔
