انفارمیشن ٹیکنالوجی اور ٹیلی مواصلات کے وزیر سید امین الحق نے کہا ہے کہ پاکستان نے گزشتہ مالی سال کے دوران انفارمیشن ٹیکنالوجی کے شعبے میں دو ارب ڈالر سے زائد مالیت کی برآمدات کے بعد ایک اور سنگ میل عبور کر لیا ہے۔انہوں نے ایک پریس ریلیز میں کہا کہ مالی سال دو ہزار بیس اکیس کے دوران ٹیلی مواصلات کمپیوٹر اور انفارمیشن سروسز میں سینتالیس اعشاریہ چار تین فیصد کی شرح نمو کے ساتھ پاکستانی برآمدات کا حجم بڑھ کر دو ارب بارہ کروڑ ڈالر تک پہنچ گیا جو گزشتہ سال ایک ارب چوالیس کروڑ ڈالر تھا۔انہوں نے اعتماد ظاہر کیا کہ 2023ء تک انفارمیشن ٹیکنالوجی کے شعبے میں پانچ ارب ڈالر کی برآمدات کا ہدف حاصل کر لیا جائے گا۔وفاقی وزیر نے برآمدات میں تاریخی اضافے پر پاکستان سوفٹ ویئر ایکسپورٹ بورڈ اور آئی ٹی کمپنیوں کی انتظامیہ کو مبارکباد دی۔