پاکستان اور لبنان نے سکیورٹی چیلنجز سے موثر طور پر نمٹنے اور دہشت گردوں اور منشیات کے مافیاز کے خلاف کارروائی کے لیے خفیہ معلومات کے تبادلے پر اتفاق کیا ہے۔
یہ اتفاق رائے آج اسلام آباد میں وزارت داخلہ میں پاکستان اور لبنان کے درمیان وفود کی سطح پر ہونے والے مذاکرات کے دوران ہوا۔
پاکستانی وفد کی قیادت وزیر داخلہ محسن نقوی جبکہ لبنانی وفد کی قیادت وزیر داخلہ احمد الحجار نے کی۔
ملاقات کے دوران سکیورٹی، انسداد دہشت گردی، منشیات کی روک تھام، غیر قانونی امیگریشن ، منی لانڈرنگ اور سائبر جرائم کی روک تھام کے حوالے سے تعاون بڑھانے پر بات چیت ہوئی۔
پولیس اکیڈمیوں اور تربیتی پروگراموں کے حوالے سے تعاون بڑھانے پر بھی بات چیت کی گئی۔ علاقائی صورتحال اور خطے میں پائیدار امن کیلئے پاکستان کی کوششوں پر بھی تبادلہ خیال کیا گیا۔
وفود کی سطح کے مذاکرات کے دوران فریقین نے دونوں ممالک کی امور داخلہ کی وزارتوں کے درمیان تعاون کے فروغ کے لیے مفاہمت کی یادداشت پر دستخط کرنے کا فیصلہ کیا ۔
