وزیراعظم محمد شہباز شریف نے مہنگائی کی شرح میں مزید کمی پر اطمینان کا اظہار کیا ہے۔

آج ایک بیان میں انہوں نے کہا کہ گزشتہ ماہ مہنگائی کی شرح 0.7 فیصد ریکارڈ ہوئی جبکہ گزشتہ سال اسی ماہ یہ شرح 20.7 فیصد تھی۔

وزیراعظم نے کہا کہ اس سال ماہ رمضان کے دوران بھی شرح مہنگائی گزشتہ کئی دہائیوں کی کم ترین سطح پر ریکارڈ کی گئی۔

انہوں نے کہا کہ مہنگائی کی شرح میں کمی سے عام آدمی کی زندگی اور ملکی معیشت پر مثبت اثرات سامنے آرہے ہیں۔

انہوں نے کہاکہ مہنگائی کی شرح میں واضح کمی حکومتی پالیسیوں کی درست سمت اور حکومت کی عوامی فلاح و بہبود کے لیے انتھک محنت کا ثبوت ہے۔

شہبازشریف نے کہا کہ ملک ترقی کی راہ پر گامزن ہو چکا ہے اور حکومت عوامی فلاح و بہبود کے لیے دن رات محنت کر رہی ہے۔