سپریم کورٹ بار ایسوسی ایشن، پاکستان بار کونسل، پنجاب بار کونسل، کے پی کے بار کونسل، بلوچستان ہائی کورٹ بار ایسوسی ایشن اور سندھ ہائی کورٹ بار ایسوسی ایشن نے مشترکہ اعلامیہ جاری کیا ہے۔

اعلامیہ میں کہا گیا ہے کہ ہم قانونی برادری کے منتخب نمائندے عدلیہ کی آزادی کے ساتھ کھڑے ہیں۔ جوڈیشل کمیشن کے اجلاس کے موقع پر انتشاری لوگوں کی جانب سے دی گئی ہڑتال کی کال کو ہم یکسر مسترد کرتے ہیں۔

اعلامیہ میں مزید کہا گیا کہ قانونی برادری میں کچھ نام نہاد شرپسند عناصر اپنے مضموم مقاصد کے لیے انتشار پیدا کرنا چاہتے ہیں، جنہیں ہم ہرگز کامیاب نہیں ہونے دیں گے۔

ہم منتخب نمائندے جوڈیشل کمیشن کی کاروائی کی مکمل حمایت کریں گے اور یقین دلاتے ہیں کہ 26 ویں آئینی ترمیم کو قانون کے مطابق منظور کیا گیا ہے۔

واضح طور پر اعلامیہ میں یہ بھی کہا گیا کہ ہڑتال کی کال کا فیصلہ صرف اور صرف منتخب قانونی باڈیز کر سکتی ہیں۔ ہم ایسی ہڑتالوں کی سختی سے مذمت کرتے ہیں اور یہ ہڑتال بھی پہلے کی طرح ایک دفعہ پھر ناکام ہوگی۔