وزیراعظم محمد شہباز شریف نے متعلقہ وزارتوں کو ہدایت کی ہے کہ وہ رمضان ریلیف پیکیج کو مزید مؤثر بنانے اور اِس کی رسائی میں اضافے سے متعلق آگاہی مہم پر دوبارہ غور کیلئے نجی شعبے کے ساتھ مل بیٹھیں۔

اسلام آباد میں نیشنل ٹیلی کمیونیکیشن کارپوریشن میں رمضان ریلیف پیکیج کی نگرانی کے طریقہ کار کا جائزہ لیتے ہوئے انہوں نے کہا کہ ڈیجیٹل والٹس سے پیسے نکالنے کی شرح 20 فیصد ہے جس کی وجہ آگاہی کی کمی ہے۔

انہوں نے کہا کہ یہ پہلی بار ہے کہ رمضان ریلیف پیکیج کے تحت مستحق خاندانوں کو پانچ ہزار روپے کی نقد رقوم نہایت شفاف طریقے سے منتقل کی جا رہی ہیں تاکہ وہ اپنی ضرورت اور پسند کے مطابق اشیاء کی خریداری کر سکیں۔

انہوں نے کہا کہ رمضان ریلیف پیکیج سے چالیس لاکھ خاندان مستفید ہوں گے۔