وفاقی وزیر خزانہ محمد اورنگزیب نے کہا ہے کہ گلگت بلتستان کی ترقی کے لیے صوبائی حکومت کے ساتھ ہر ممکن تعاون کو یقینی بنایا جائے گا۔

سکردو میں وزیر اعلیٰ گلگت بلتستان حاجی گلبر خان سے گفتگو کرتے ہوئے وفاقی وزیر خزانہ نے کہا کہ گلگت بلتستان میں جاری پی ایس ڈی پی کے منصوبوں کو مقررہ مدت میں مکمل کرنے کے لیے وسائل فراہم کیے جائیں گے۔

انہوں نے کہا کہ پہلی سہ ماہی میں گلگت بلتستان کے ترقیاتی بجٹ کا 40 فیصد کا اجرا ممکن بنایا جائے گا۔

وزیر اعلیٰ نے کہا کہ ہمیں امید ہے آپ گلگت بلتستان کو درپیش مسائل جن میں 4 نئے اضلاع کا قیام، گلگت بلتستان کو نیشنل فنانس کمیشن (NFC) سے حصہ کا تعین، دیامر بھاشا ڈیم کا نیٹ ہائیڈل پروفٹ اور نئے آسامیوں کی تخلیق کے حوالے سے اپنا خصوصی کردار ادا کریں گے۔