ایسٹر کے موقع پر بین المذاہب ہم آہنگی کو فروغ دینے کیلئے واشنگٹن میں پاکستانی سفارتخانے میں خصوصی تقریب کا اہتمام کیا گیا۔
تقریب کا انعقاد بین المذاہب ہم آہنگی کے حوالے سے کام کرنے والی واشنگٹن ڈی سی کی معروف تنظیم آل نیبرز ایسوسی ایشن اور سفارتخانہ پاکستان کی جانب سے کیا گیا۔
تقریب میں مختلف مذاہب سے تعلق رکھنے والے افراد، مذہبی رہنماؤں اور پاکستانی امریکن کمیونٹی خصوصاً مسیحی برادری کی سرکردہ شخصیات نے شرکت کی۔
تقریب سے خطاب کرتے ہوئے صدر آل نیبرز ایسوسی ایشن الیاس مسیح نے ایسٹر کے موقع پر مسیحی برادری کی خوشیوں میں شامل ہونے اور اس حوالے سے خصوصی تقریب کا اہتمام کرنے پر سفیر پاکستان رضوان سعید شیخ کا خصوصی شکریہ ادا کیا۔
صدر آل نیبرز ایسوسی ایشن اور دیگر مذہبی رہنماؤں نے اپنے خیالات کا اظہار کرتے ہوئے بین المذاہب ہم آہنگی کے فروغ کے حوالے سے حکومت پاکستان اور ملکی قیادت کے اقدامات کو خصوصی طور پر سراہا۔
صدر آل نیبرز ایسوسی ایشن نے شرکاء کو بتایا کہ پاکستان کے بارے میں آگاہی فراہم کرنے اور دونوں ملکوں کے عوام کے درمیان قریبی تعلقات کے فروغ کے حوالے سے مختلف وفود پاکستان لے کر گئے، اس حوالے سے انہیں حکومت پاکستان اور پاکستان سفارتخانے کی جانب سے مکمل حمایت میسررہی ہے۔
انہوں نے کہا کہ اس مشن کو مزید آگے بڑھاتے ہوئے وہ طلبہ کا ایک وفد پاکستان لے جانے کا ارادہ رکھتے ہیں۔
ڈپٹی چیف آف مشن بتول کاظم نے بین المذاہب ہم آہنگی کے حوالے سے حکومتی عزم کا اعادہ کرتے ہوئے کہا کہ بین المذاہب ہم آہنگی کا فروغ حکومت پاکستان کی اولین ترجیحات میں شامل ۔ہے۔ انہوں نے کہا کہ ہمارے معاشرے کا تنوع ہماری طاقت ہے۔
انہوں نے پاکستان کی تعمیر و ترقی میں مسیحی برادری کی خدمات کو بھی سراہا۔
بتول کاظم نے بین المذاہب ہم آہنگی اور دونوں ملکوں کے عوام کو ایک دوسرے کے قریب لانے کے حوالے سے صدر آل نیبرز ایسوسی ایشن اور ان کی ٹیم کو خصوصی طور پر خراج تحسین پیش کیا۔
تقریب میں مختلف شرکاء نے ایسٹر جیسی تقریبات کے انعقاد اور مختلف مذاہب کے پیروکاروں کو ایک چھت تلے جمع کرنے اور ان کی خوشیوں میں شریک ہونے کے عمل کو سراہتے ہوئے سفیر پاکستان رضوان سعید شیخ کا خصوصی طور پر شکریہ ادا کیا۔
