فائل فوٹو
وزارت تعلیم نے بدھ کے روز قومی سطح پر یکساں نصابی کتب کی پالیسی سے متعلق تمام صوبائی حکومتوں کو ایک خط تحریر کیا ہے اور نجی ناشران کو بھی طلبا کے سیکھنے کا عمل مدنظر رکھتے ہوئے یہ درسی کتب تیار کرنے کی اجازت دے دی ہے۔
وزارت کے مطابق نجی پبلشرز کو اس حوالے سے اپنے متعلقہ علاقوں کے ٹیکسٹ بک بورڈز سے این او سی حاصل کرنا ہو گا تاکہ بورڈز یہ چیک کر سکیں کہ نصاب میں کوئی ملک دشمن اور مذہب کے خلاف یا کوئی دیگر قابل اعتراض مواد تو شامل نہیں کیا گیا۔وفاقی تعلیم اور پیشہ ورانہ تربیت کی وزارت نے تمام صوبائی ٹیکسٹ بک بورڈز کو ہدایت کی ہے کہ وہ یہ بات یقینی بنائیں کہ یکساں قومی نصاب کے مقاصد سے ہم آہنگ درسی کتب تیار کرنے والے نجی پبلشرز اپنے فرائض بطریق احسن ادا کریں۔وزارت نے متعلقہ حکام کو بھی آگاہ کیا ہے کہ سکولوں کی طویل عرصے تک بندش اور مئی اور جون میں ہونے والے امتحانات کو اگلی تاریخوں تک موخر کرنے کی وجہ سے نیا تعلیمی سال اب اگست میں شروع ہو گا۔یاد رہے کہ وفاقی تعلیم اور پیشہ ورانہ تربیت کی وزارت نے صوبائی حکومتوں اور دوسرے تمام فریقوں کی مشاورت سے ابتدائی سے پانچویں جماعت تک کا قومی نصاب تیار کیا ہے جو اگلے تعلیمی سال سے ملک بھر کے تمام سرکاری اور نجی سکولوں میں رائج کیا جائے گا۔