عمران خان نے کہا ہے کہ حکومت برآمدکنندگان کو تمام ممکنہ سہولیات فراہم کر رہی ہے۔آج (بدھ) اسلام آباد میں برآمدات میں اضافے کے بارے میں ایک جائزہ اجلاس کی صدارت کرتے ہوئے وزیراعظم نے برآمدی مصنوعات میں تنوع پر زور دیا۔وزیراعظم نے کہا کہ پاکستانی مصنوعات کے لئے منڈیاں فراہم کرنے والے ممالک پر توجہ دینے کی ضرورت ہے اور اس سلسلے میں بیرون ملک پاکستانی مشنز میں تعینات افسران کو اہداف دینے کی ہدایت کی۔مسابقتی تجزیہ پیش کرتے ہوئے کامرس ڈویژن نے اجلاس کو بتایا کہ سال 21-2020ء میں تیار مصنوعات کی برآمدات میں سال18-2015کے مقابلے میں تین ارب 80 کروڑ ڈالر کا اضافہ ہوا۔اجلاس کو بتایا گیا کہ سرمایہ کار دوست پالیسیوں اور برآمدکنندگان کو مراعات کی بدولت غیرروایتی مصنوعات کی برآمد میں دو ارب ستر کروڑ ڈالر کا اضافہ ہوا ہے۔اجلاس کو بتایا گیا کہ روایتی مصنوعات کی برآمدات کے علاوہ غیرروایتی مصنوعات کے حجم میں اضافے کیلئے اقدامات کئے جا رہے ہیں جن میں اشیائے خوردونوش، پھل، انفارمیشن ٹیکنالوجی اور ظروف سازی شامل ہیں۔