خیبرپختونخوا کے ہنگامی امدادی ادارے نے کل سے اتوار تک صوبے کے بالائی حصوں میں بارشوں اور پہاڑوں پر برفباری کا انتباہ جاری کیا ہے۔

پی ڈی ایم اے خیبرپختونخوا کے مطابق تمام ڈپٹی کمشنرز کو ہدایت کی گئی ہے کہ وہ اس عرصے کے دوران کسی بھی جانی و مالی نقصان سے بچنے کیلئے احتیاطی تدابیر اختیار کریں۔

ادارے نے تمام متعلقہ محکموں کو بھی ہدایت کی کہ وہ لینڈ سلائیڈنگ کے باعث سڑکیں بند ہونے کی صورت میں ٹریفک اور رابطہ سڑکوں کی بحالی کیلئے چوکس رہیں۔

سیاحوں سے بھی کہا گیا ہے کہ وہ اس عرصے میں صوبے کے پہاڑی علاقوں میں جانے سے گریز کریں۔

پی ڈی ایم اے کا کنٹرول روم چوبیس گھنٹے فعال ہے اور لوگ کسی بھی ہنگامی صورتحال میں 1700 پر رابطہ کر سکتے ہیں۔