وفاقی وزیراطلاعات و نشریات عطاء اللہ تارڑ نے جعفر ایکسپریس کے المناک سانحے پر گفتگو کرتے ہوئے کہا کہ اللہ کا شکر ہے کہ سکیورٹی فورسز نے کامیاب آپریشن کے ذریعے دہشت گردوں کا خاتمہ کیا، شہریوں کو یرغمال بنانے والے 33 دہشت گردوں کو جہنم واصل کیا گیا، آپریشن شروع ہونے سے پہلے 21 جانوں کا نقصان ہوا، پاک فوج کے 4 جوان بھی شہید ہوئے۔

انہوں نے کہا کہ پاک فوج، ایف سی، ایس ایس جی اور ایئر فورس نے مہارت سے اس آپریشن کو مکمل کیا، آپریشن کے دوران بہادری اور دلیری کے ساتھ پاک فوج کے جوانوں نے دہشت گردوں کا مقابلہ کیا، ٹرین میں 440 افراد سوار تھے، یرغمال مسافروں کو بازیاب کراکے محفوظ مقام پر منتقل کردیا گیا ہے۔

وزیراطلاعات نے کہا کہ وزیراعظم محمد شہباز شریف، حکومت پاکستان، افواج پاکستان اور چیف آف آرمی سٹاف جنرل عاصم منیر نے دہشت گردی کے ناسور کو جڑ سے اکھاڑنے کا غیر متزلزل عزم کر رکھا ہے،دہشت گردی کے ناسور کو جڑ سے اکھاڑ پھینکیں گے، ملک کو امن کا گہوارہ بنائیں گے، دہشت گرد کبھی بھی اپنے مذموم مقاصد میں کامیاب نہیں ہوں گے، جب تک دہشت گردی کا خاتمہ نہیں ہو جاتا، ہم چین سے نہیں بیٹھیں گے۔

عطاء اللہ تارڑ نے کہا کہ بھارتی میڈیا کی طرف سے بہت افسوسناک پروپیگنڈا کیا گیا، کچھ سیاسی عناصر نے اس افسوسناک واقعہ کو اپنی سیاست چمکانے کے لئے استعمال کیا، اس سانحہ پر جو سیاست کھیلی گئی جس کی مذمت کرتے ہیں،انڈین میڈیا، بی ایل اے اور پی ٹی آئی اس واقعہ پر ایک زبان بول رہے تھے،کاش یہ اس آپریشن کے حوالے سے مصدقہ معلومات پر بات کرتے، جھوٹا بیانیہ بنانے پر تحریک انصاف کو شرمسار ہونا چاہئے