روس پاکستان کے کھاد کے پلانٹ کو جدید بنانے کیلئے اپنے ماہرین کی خدمات پیش کرنے اور زرعی پیداوار میں اضافے کے لئے پاکستانی کسانوں کے تربیتی پروگرام شروع کرنے کا خواہشمند ہے۔یہ بات روس کے نائب وزیر صنعت و تجارت ALEKSEI GURZDEV نے اسلام آباد میں وزیر تجارت جام کمال خان سے ملاقات میں کہی۔
ملاقات کے دوران اقتصادی تعاون کو مضبوط بنانے اور دونوں ملکوں کے درمیان تجارت کی نئی راہیں تلاش کرنے پر تبادلہ خیال کیا گیا۔
روس کے نائب وزیر صنعت وتجارت نے زرعی برآمدات بڑھانے اور پاکستان کے لئے دھاتی مصنوعات کے ساتھ ساتھ ریلوے مشینری کی فراہمی میں روس کی دلچسپی کا اظہار کیا۔
جام کمال خان نے اس موقع پر گفتگو کرتے ہوئے پاکستان اور روس کے درمیان تجارتی امکانات سے استفادہ کرنے کی اہمیت پر زور دیا۔
ملاقات میں اس ماہ کی چھبیس تاریخ کو اسلام آباد میں ہونے والے ورکنگ گروپ کے پانچویں مشترکہ اجلاس پر بھی تبادلہ خیال کیا گیا۔