پنجاب کی وزیر اطلاعات عظمیٰ بخاری نے کہا ہے کہ عوام پی ٹی آئی کی انتشار کی سیاست سے متنفر ہیں اور حکومت کسی کو قانون ہاتھ میں لینے کی اجازت نہیں دے گی۔
انہوں نے آج لاہور میں نیوز کانفرنس سے خطاب کرتے ہوئے کہاکہ لاہور میں صورتحال معمول پر ہے اور کسی نے پی ٹی آئی کی احتجاج کی کال پر کان نہیں دھرے ۔
انہوں نے کہاکہ پنجاب حکومت مستعد ہے اورکسی ناخوشگوار صورتحال سے نمٹنے کیلئے تیار ہے اورہرقیمت پر عوام کے جان ومال کا تحفظ کیاجائے گا ۔
عظمیٰ بخاری نے کہاکہ خیبرپختونخوا کے وزیراعلی ، علی امین گنڈا پور نے صوابی سے احتجاج کی قیادت کرنے کا اعلان کیا ہے لیکن کسی بھی جگہ احتجاج کا نام ونشان نہیں ہے جس سے ظاہر ہوتا ہے کہ لوگوں کو پی ٹی آئی کی سیاست سے کوئی دلچسپی نہیں ہے ۔
انہوں نے کہاکہ بانی پی ٹی آئی کی اہلیہ یا بچے اور نہ ہی پارٹی کے کسی رکن کے بچے احتجاج میں حصہ لے رہے ہیں ۔
انہوں نے کہاکہ خیبرپختونخوا کے سرکاری حکام کو احتجاج میں شرکت پرمجبور کیاجارہا ہے حالانکہ ان کے اپنے صوبے میں امن وامان کی صورتحال خراب ہوتی جارہی ہے اور پی ٹی آئی کی حکومت نے اس صورتحال سے نمٹنے کیلئے کوئی سنجیدگی نہیں دکھائی۔
