سینیٹ نے آج بھارت کے غیرقانونی زیرقبضہ جموں وکشمیر کے علاقے پہلگام میں حملے کے ذریعے بھارتی حکومت کی طرف سے پاکستان کو بدنام کرنے کیلئے شروع کی گئی شرانگیز مہم اورا سکے نتیجے میں پاکستان اور بھارت کے درمیان بڑھتی ہوئی کشیدگی کے معاملے پر بحث جاری رکھی۔
بحث میں حصہ لیتے ہوئے سینیٹر عرفان الحق صدیقی نے کہاکہ پہلگام واقعہ بھارتی حکام کی جانب سے پاکستان کو بدنام کرنے کیلئے ایک جھوٹا فلیگ آپریشن ہے ۔
انہوں نے کہاکہ ایسے واقعات پر تحقیقات اور شواہد کے بغیر پاکستان پر جھوٹے الزامات عائد کرنا بھارت کا پرانا وطیرہ ہے ۔
سید علی ظفر نے کہاکہ بھارت پہلگام جیسے واقعات کے ذریعے اپنے سیاسی عزائم پورا کرنے کیلئے بدنام ہے ۔
انہوں نے کہاکہ بھارت یکطرفہ طورپر سندھ طاس معاہدے کو منسوخ یا معطل نہیں کرسکتا انہوں نے خبردار کیاکہ پاکستان کسی بھی بھارتی جارحیت کا منہ توڑ جواب دے گا۔
فیصل واوڈا نے کہا ملک کو بیرونی جارحیت سے بچانے کیلئے پوری قوم متحد ہے انہوں نے کہاکہ پاکستان کی مسلح افواج کسی بھی طرح کے حالات کامقابلہ کرنے کی پوری صلاحیت رکھتی ہیں ۔
انوارالحق کاکڑ نے کہاکہ بھارتی حکمرانوں کی ہندتوا سیاست نے مسلمانوں اور دیگر اقلیتوں کو بھی حقوق سے محروم کیا ہے ۔
کامران مرتضی نے بغیر کسی تحقیق کے نتیجہ اخذ کرنے پر بھارتی حکومت کو شدید تنقید کا نشانہ بنایا ۔
اس موقع پر پونجو بھیل ، منظور کاکڑ، جان محمد اور سید شبلی فراز نے بھی خطاب کیا ۔
ایوان کا اجلاس اب کل سہ پہر تین بجے ہوگا ۔
