فائل فوٹو

قومی تحفظ خوراک اور تحقیق کے وزیر طارق بشیر چیمہ نے ملک میں خوراک کی قلت کے امکان کو مسترد کر دیا ہے کیونکہ رواں برس پاکستان میں گندم کی ریکارڈ فصل ہوئی ہے۔

انہوں نے عالیہ کامران اور دیگر کی طرف سے ایک توجہ دلاؤ نوٹس کا جواب دیتے ہوئے کہا کہ گزشتہ سال کی ذخیرہ شدہ گندم کے علاوہ رواں سال دو کروڑ پچاسی لاکھ میٹرک ٹن گندم کی شاندار فصل ہوئی ہے۔

انہوں نے یقین ظاہر کیا کہ ہمیں گندم درآمد کرنے کی ضرورت نہیں پڑے گی کیونکہ ملکی ضروریات پوری کرنے کیلئے وافر ذخیرہ موجود ہے۔

قومی اسمبلی نے آج پاکستان رویت ہلال بل 2022 کی منظوری دی۔

اس بل کا مقصد اسلامی ہجری کیلنڈر کے مہینوں کے آغاز کیلئے چاند دیکھنے کے نظام کو باضابطہ بنانا اور مختلف مکاتب کے درمیان ہم آہنگی پیدا کرنا ہے۔

یہ بل قانون کے وزیر مملکت شہادت اعوان نے پیش کیا تھا۔

ایوان کا اجلاس اب آئندہ ماہ کی 9 تاریخ کو سہ پہر چار بجے ہو گا۔