وزیر خزانہ محمد اورنگزیب نے واشنگٹن میں جنوبی ایشیاء کے لئے عالمی بینک کے نائب صدر مارٹن ریزر سے ملاقات اور اس امر پر اطمینان ظاہر کیا کہ دوطرفہ شراکت داری کے نئے لائحہ عمل کو جلد حتمی شکل دی جائے گی۔وزیر خزانہ نے توانائی اور ٹیکس کے شعبوں میں اصلاحات اور سرکاری ملکیتی اداروں کی استعداد کار میں اضافے کے حکومتی پروگرام سے آگاہ کیا۔انہوں نے کہا کہ حکومت ان شعبوں میں مختصر اور طویل مدتی اہداف کے حصول کے لئے عمل پیرا ہے۔انہوں نے عالمی بینک کی اعلیٰ قیادت کے ساتھ اپنی ملاقات کا حوالہ دیتے ہوئے کہا کہ موسمیاتی تبدیلی ڈیجیٹلائزیشن اور انسانی ترقی پر عالمی بینک کی توجہ حکومت کی ترجیحات کے مطابق ہے۔محمد اورنگزیب نے اقتصادی ترقی کے بارے میں ملک کی حقیقی صلاحیتوں کو بروئے کار لانے کے لئے حکومت کے ویژن کو اجاگر کیا۔وزیر خزانہ نے سرمایہ کاری کے لئے ایک چھت تلے تمام سہولیات کی فراہمی کے لحاظ سے خصوصی سرمایہ کاری سہولت کونسل کے کردار کے بارے میں بھی آگاہ کیا۔