قدرتی آفات سے نمٹنے کے قومی ادارے نے کل سے منگل تک بارش کے متوقع سلسلے کے دوران عوام کے لئے احتیاطی تدابیر کے حوالے سے ایک ایڈوائزری جاری کی ہے۔
ایڈوائزری کے مطابق مغربی لہر سے گرج چمک کے ساتھ شدید بارش کی توقع ہے۔
بلوچستان ، خیبرپختونخوا، گلگت بلتستان اور کشمیر کے کچھ حصوں میں موسلادھار سے درمیانے درجے کی بارشیں ، آندھی، ژالہ باری اور پہاڑی مقامات پر برف باری کا امکان ہے۔
اس صورتحال کے پیش نظر این ڈی ایم اے نے بالخصوص بالائی خیبرپختونخوا، مری، گلیات، کشمیر اور گلگت بلتستان میں ممکنہ سیلاب اور لینڈ سلائیڈنگ سے نمٹنے کیلئے تیار رہنے کا مشورہ دیا ہے۔
دریاؤں کے کناروں اور نالوں کے قریب رہنے والوں کو ہدایت کی گئی ہے کہ وہ پانی کی بڑھتی ہوئی سطح کے بارے میں آگاہ رہیں اور ضرورت پڑنے پر وہاں سے چلے جائیں۔