دفتر خارجہ کی ترجمان ممتاز زہرہ بلوچ نے کہا ہے پاکستان کو اطلاعات ملی ہیں کہ خراسان صوبے میںموجود داعش نے گزشتہ جمعے کو کابل میں پاکستانی سفارتخانے پر دہشت گردی کے حملے کی ذمہ داری قبول کرلی ہے۔ انہوں نے ایک بیان میں کہا کہ پاکستان ان اطلاعات کی صداقت کے حوالے سے افغان حکام سے مشاورت اور آزادانہ طورپر تصدیق کررہا ہے ۔ترجمان نے کہاکہ کابل میں پاکستانی سفارتخانے پر حملہ افغانستان اور خطے کے امن واستحکام کو درپیش دہشت گردی سے لاحق خطرے کی طرف ایک بار پھر توجہ دلا رہا ہے ۔انہوں نے کہاکہ ہمیں دہشت گردی کے خاتمے کیلئے اپنی مجموعی طاقت کے ذریعے ثابت قدمی کا مظاہرہ کرنے کی ضرورت ہے۔ ترجمان نے کہا کہ پاکستان دہشت گردی کا مقابلہ کرنے کے عزم پرمضبوطی سے کاربند رہے گا۔