دفتر خارجہ کے ترجمان زاہدحفیظ چوہدری نے پاک افغان سرحد پر پاکستانی فوجیوں پر منظم حملے کی مذمت کی ہے اور کہا ہے کہ ایسی کارروائیاں سرحد پر جاری امن و استحکام کیلئے نقصان دہ ہے۔

ژوب ضلع میں پاکستانی فوجیوں پر حملے کے حوالے سے میڈیاکے سوالات کے جوابات دیتے ہوئے انہوں نے کہا کہ کم و بیش بیس دہشت گردوں نے پاکستان کی باڑ لگانے والی پارٹی پر آج صبح حملہ کیا‘ حملے میں چھوٹے اور بھاری ہتھیاروں کا استعمال کیا گیا‘ جس کے نتیجے میں چار پاکستانی سپاہی شہید جبکہ چھ شدید زخمی ہوئے۔زاہد حفیظ چوہدری نے کہا اسلام آباد میں قائم افغانستان کے سفارتخانے کو کہہ دیا گیا ہے کہ متعلقہ افغان حکام کو پاکستان کے تحفظات سے آگاہ کیا جائے اور افغان سرزمین سے متحرک دہشت گرد گروپوں کے خلاف موثر اقدامات کیے جائیں‘ متفقہ پروٹوکول اور ایس او پیز پر عملدرآمدر کیا جائے اور مستقبل میں ایسے واقعات کو روکاجائے۔