پاکستان مسلم لیگ نون کے رہنما اور پائیدار ترقیاتی اہداف کے بارے میں قومی پارلیمانی ٹاسک فورس کے کنوینربلال اظہر کیانی نے کہا ہے کہ برآمدات کا فروغ حکومت کی اولین ترجیحات میں شامل ہے ۔
انہوں نے آج لاہور میں صحافیوں سے گفتگو کرتے ہوئے کہاکہ پاکستان مسلم لیگ نون نے ہمیشہ قومی معیشت کو بہتر بنانے کیلئے کام کیا ہے ۔
انہوں نے کہا کہ حکومت کے اقدامات کے نتیجے میں زرمبادلہ کے ذخائر میں اضافہ ہورہا ہے ، کرنسی مستحکم ہورہی ہے اور افراط زر کی شرح کم ہوکر نواعشاریہ چھ فیصد ہوگئی ہے ۔
بلا ل اظہر کیانی نے کہاکہ حکومت عوام کو ریلیف دینے کیلئے تمام وسائل بروئے کار لارہی ہے۔
انہوں نے بتایا کہ وفاقی حکومت نے بجلی کے دوسو یونٹ تک استعمال کرنے والے صارفین کیلئے پچاس ارب روپے کا پیکج وقف کیا ہے ۔
انہوں نے کہاکہ پنجاب حکومت نے بجلی کے دو سو ایک سے پانچ سو یونٹ تک استعمال کرنے والے صارفین کو اگست اور ستمبر کے بلوں میں چودہ روپے فی یونٹ کا ریلیف دیا ہے۔
بلال اظہر کیانی نے پاکستان کو دیوالیہ کے دہانے تک پہنچانے پر پی ٹی آئی کی حکومت پر تنقید کی۔
انہوں نے زوردیاکہ پاکستان کی معیشت درست سمت میں گامزن ہے اوربین الاقوامی اداروں کا اعتماد بحال ہورہاہے۔
