پاکستان نے بھارتی وزیرخارجہ کے غیرذمہ دارانہ اور اشتعال انگیز بیان کی شدید مذمت کی ہے جس میں انہوں نے پاکستان میں نام نہاد سرجیکل سٹرائیک کی دھمکی دی ہے ۔
دفترخارجہ کے ترجمان عاصم افتخار احمد نے آج ایک بیان میں کہا کہ اس غیرذمہ دارانہ بیان سے صرف پاکستان سے عداوت پرمبنی سیاسی مخالفت اور نظریاتی وجوہات دونوں کیلئے علاقائی کشیدگی بڑھانے کی بی جے پی آر ایس ایس کے گٹھ جوڑ کی سازش ظاہر ہوتی ہے۔انہوں نے کہاکہ یہ بیانات بھارت کے غیرقانونی زیرتسلط جموں وکشمیر میں بھارتی ریاستی دہشت گردی اور انسانی حقوق کی منظم خلاف ورزیوں اور بھارت میں مسلمانوں اور دیگر اقلیتوں کے خلاف مظالم سے عالمی برادری کی توجہ ہٹانے کی بھی ایک کوشش ہے ۔ترجمان نے کہاکہ پاکستان بار بار عالمی برادری کی توجہ پاکستان اور کشمیریوں کے خلاف جعلی فلیک آپریشن کے بھارت کے مذموم عزائم پرمبذول کراتا رہا ہے ۔انہوں نے کہاکہ پاکستان ایک امن پسند ملک ہے اور کسی بھی قسم کے جارحانہ عزائم کو ناکام بنانے کیلئے کوئی کسر نہیں اٹھا رکھے گا۔
