موسمیاتی تبدیلی کے بارے میں وزیراعظم کی رابطہ کار رومینہ خورشید عالم نے کہا ہے کہ خواتین کو فنی تربیت کے ذریعے بااختیار بنانا موسمیاتی تبدیلی کے اثرات سے نمٹنے کی حکمت عملی وضع کرنے کیلئے ناگزیر ہے۔

اسلام آباد میں 17ویں سالانہ رورل ویمن لیڈرشپ ٹریننگ کانفرنس سے خطاب کرتے ہوئے انہوں نے کہا کہ زراعت اور معاشرے کی ترقی میں دیہی خواتین کے اہم کردار کو نظر انداز نہیں کیا جاسکتا۔

رومینہ خورشید عالم نے تمام شراکت داروں، پالیسی سازوں اور معاشرے کے طبقات پر زور دیا کہ وہ سماجی و اقتصادی ترقی میں دیہی خواتین کے کردار کا اعتراف کریں اور انہیں بااختیار بنانے کیلئے اقدامات کریں۔