وزیراعظم شہباز شریف نے کہا ہے کہ پاکستان بین الاقوامی قانون کے تحت تنازعات کے پُرامن حل کے لیے پُرعزم ہے اور اقوام متحدہ اور شنگھائی تعاون تنظیم کے منشور پر پوری طرح کاربند ہے۔
انہوں نے کرغزستان کے دارالحکومت بشکیک میں شنگھائی تعاون تنظیم کے سربراہانِ مملکت کی کونسل کے اجلاس سے خطاب کرتے ہوئے کہا کہ اسی جذبے کے تحت پاکستان نے اس وقت بھرپور انداز میں امن کی حمایت کی جب رواں سال کے آغاز میں شنگھائی تعاون تنظیم کے ایک رکن ملک کی خودمختاری اور علاقائی سالمیت کی خلاف ورزی کی گئی، جس سے خطے میں ایک بڑا بحران پیدا ہوا۔
وزیراعظم شہباز شریف نے کہا کہ اس بحران کے باعث توانائی کی اہم ترسیلی گزرگاہیں بند ہونے سے عالمی معیشت متاثر ہوئی ہے۔
انہوں نے کہا کہ پاکستان کی مسلسل سفارتی کوششیں خطے میں کشیدگی کم کرنے اور امن کی بحالی کے لیے اسلام آباد مفاہمتی یادداشت پر دستخط کی صورت میں کامیاب ہوئیں۔
شہباز شریف نے کہا کہ پاکستان کا پختہ یقین ہے کہ اسلام آباد مفاہمتی یادداشت خطے میں دیرپا امن کے قیام کے لیے سب سے قابلِ عمل اور پائیدار راستہ فراہم کرتی ہے۔
