وزیر اعظم شہباز شریف نے کہا ہے کہ پاکستان میں چینی زبان اور ادب کے فروغ کے لیے سرکاری اور نجی سطح پر تمام ممکنہ اقدامات کیے جا رہے ہیں تاکہ دونوں ممالک کے درمیان دوطرفہ تعلقات کو مزید مستحکم کیا جا سکے۔
چینی زبان کے عالمی دن کے موقع پر اپنے پیغام میں وزیراعظم نے کہا کہ چین نے اپنی معاشی ترقی کی بدولت دنیا بھر میں اپنی پہچان بنائی ہے۔ انہوں نے کہا کہ چینی ثقافت اور زبان تیزی سے پوری دنیا میں مقبول ہو رہی ہے۔
شہباز شریف نے کہا کہ چینی دنیا بھر میں رابطے کی بڑی زبان بن چکی ہے۔ اقوام متحدہ نے چینی زبان کو بھی رابطے کی سرکاری زبانوں میں شامل کیا ہے۔
شہباز شریف نے کہا کہ چین پاکستان اقتصادی راہداری کی وجہ سے پاکستان اور چین کے درمیان اقتصادی اور ثقافتی تعلقات تیزی سے ترقی کر رہے ہیں۔ انہوں نے کہا کہ پاکستان میں چینی زبان سیکھنے والوں کی تعداد میں تیزی سے اضافہ ہو رہا ہے جس سے دونوں ممالک کے درمیان تعلقات مزید مضبوط ہوں گے۔
