انفارمیشن ٹیکنالوجی کے وزیرامین الحق نے عزم ظاہر کیاہے کہ نوجوانوں کے لئے آئی ٹی کی بہترین سہولیات کی ممکنہ فراہمی کو یقینی بنایا جائے گا جودورحاضرمیں کامیابی کی بنیادہے۔
کراچی میں ایک اجلاس سے خطاب کرتے ہوئے وفاقی وزیرنے کہاکہ پچھترارب روپے مالیت کے آئی ٹی کے سترنئے منصوبے شروع کئے گئے ہیں۔انہوں نے کہاکہ ملک میں سمارٹ فونزتیارکئے جارہے ہیں جومناسب قیمتوں پر دستیاب ہوںگے۔وفاقی وزیرنے کہاکہ چھوٹے شہروں اوردیہات میں انٹرنیٹ کی دستیابی یقینی بنانے کے لئے ٹھوس اقدامات کئے جارہے ہیں۔
ادھرکراچی میں سٹارٹ اپس کانفرنس سے خطاب کرتے ہوئے وفاقی وزیرنے کہاکہ گوگل کے ساتھ پینتالیس ہزاروظائف کاایک معاہدہ کیاگیا ہے جن کی تعداد اگلے سال اضافے کے ساتھ ساڑھے چارلاکھ تک پہنچ جائے گی۔انہوں نے کہاکہ چالیس فیصدوظائف خواتین کے لئے مختص کئے گئے ہیں۔امین الحق نے مزید کہاکہ ملک کے مختلف بڑے شہروں میں آئی ٹی کے آٹھ قومی تربیتی مراکزکام کررہے ہیں۔