پاکستان نے آبنائے ہرمز کے ذریعے سویلین جہازوں کی تیز رفتار اور محفوظ آمد و رفت کا مطالبہ کیا ہے۔

یہ بات اقوام متحدہ میں پاکستان کے مستقل مندوب عاصم افتخار احمد نے جنرل اسمبلی میں آبنائے ہرمز پر ویٹو مباحثے سے خطاب کرتے ہوئے کہی۔

پاکستانی مندوب نے کہا کہ آبنائے ہرمز کی موجودہ صورتحال دنیا بھر کے ممالک بشمول پاکستان پر منفی اثرات مرتب کر رہی ہے۔ انہوں نے کہا کہ اس کے اثرات نہ صرف توانائی کی فراہمی تک محدود ہیں بلکہ کھاد اور دیگر ضروری اشیاء تک بھی پہنچتے ہیں، جس سے غذائی تحفظ، مہنگائی اور کمزور طبقات کے روزگار پر دبائو بڑھ رہا ہے۔

عاصم افتخار نے کہا کہ یہ معاملہ نہ صرف خلیج تعاون کونسل کے ممالک بلکہ خطے اور اس سے باہر تمام ریاستوں، بشمول پاکستان کیلئے اہم ہے۔

پاکستانی مندوب نے کہا کہ پاکستان خطے میں دیرپا امن کے حصول کیلئے تمام کوششوں کی حمایت میں اپنا تعمیری کردار ادا کرنے کیلئے پرعزم ہے۔