غیرقانونی طورپر بھارت کے زیر قبضہ جموں وکشمیر میں لوگوں نے عید میلاد النبیۖ کی تاریخ پر ابہام پیدا کرنے کی بھارت کی کوشش کو ناکام بناتے ہوئے پاکستان کے ساتھ مل کر آج یہ دن مذہبی جوش وجذبے کے ساتھ منایا۔

کشمیرمیڈیاسروس کے مطابق بھارتی حکومت نے نبی اکرم ۖ کے یوم ولادت پر تعطیل کے حوالے سے جان بوجھ کر واضح احکامات جاری نہیں کئے جس سے سرکاری ملازمین اورا سکولوں میں غیر یقینی کی صورتحال پیدا ہو گئی۔

تاہم کشمیریوں نے نام نہاد تقسیم پیدا کرنے کی بھارتی حکومت کی کوشش کو مسترد کرتے ہوئے بھرپور اتحاد کامظاہرہ کیا اور اپنے عقیدے اورروایات کے مطابق پاکستان کے ساتھ عید میلاد النبی ۖمنائی۔

بھارتی قابض حکام نے اسمبلی انتخابات کے پہلے مرحلے سے قبل مقبوضہ جموں و کشمیر میں سکیورٹی کے نام پر پابندیاں مزید سخت کر دی ہیں۔

پولنگ اسٹیشنوں اور بوتھس کو محفوظ بنانے کیلئے بڑی تعداد میں سینٹرل آرمڈ پیرا ملٹری فورسز اور بھارتی پولیس کو تعینات کیا گیا ہے۔

بی بی سی کی ایک تازہ رپورٹ میں کہا گیا ہے کہ مودی کی بھارتیہ جنتا پارٹی کو اپنی پالیسیوں کی وجہ سے جموں اور کشمیر دونوں میں شدیدپریشانی کا سامناہے۔

2019ء میں کشمیر کی خصوصی حیثیت ختم کئے جانے کے بعد ہونے والے پہلے انتخابات میں تاریخی بائیکاٹ سے لے کر بی جے پی کی پالیسیوں کو چیلنج کرنے کی صورت میں تبدیلی دیکھی جا رہی ہے۔

بی بی سی کی رپورٹ میں کہا گیا ہے کہ کسی کوبھی بی جے پی کی کامیابی کی امید نہیں ، کیونکہ وادی میں اس کی پوزیشن انتہائی کمزورہے۔