وزیر خزانہ محمد اورنگزیب نے برآمدی ترقی کو بڑھانے اور مقامی تیارکنندگان کو سازگار ماحول کی فراہمی کے لئے حکومت کے عزم کا اعادہ کیا ہے۔

انہوں نے یہ بات جمعرات کے روز اسلام آباد میں پاکستان موبائل فون مینوفیکچررز ایسوسی ایشن کے ایک وفد سے ملاقات میں کہی۔

وفاقی وزیر نے برآمدات کے لئے پالیسی لائحہ عمل پر زیادہ توجہ کی ضرورت پر زور دیا۔

انہوں نے اس سلسلے میں قیمتی آراء کو سراہتے ہوئے ملک میں ڈیجیٹل ماحولیاتی نظام کو وسعت دینے کیلئے حکومت کے عزم پر زور دیا۔

وفد نے کہا کہ ایسے مستحکم اور مربوط پالیسی ماحول کے قیام کی ضرورت ہے جس سے مقامی تیارکنندگان کی حوصلہ افزائی ہو۔

ملاقات میں مقامی سطح پر مصنوعات کی تیاری کو فروغ دینے اور برآمدی استعدادکار بڑھانے کیلئے مربوط پالیسی لائحہ عمل مرتب کرنے کی ضرورت پر اتفاق کیاگیا۔