بے نظیر انکم سپورٹ پروگرام اور پاپویشن کونسل نے پاکستان میں زچہ وبچہ کی نگہداشت کی سہولتیں بہتر بنانے کے لئے کوششیں شروع کرنے پر اتفاق کیا ہے۔

یہ اتفاق اسلام آباد میں بے نظیر انکم سپورٹ پروگرام کی چیئرپرسن روبینہ خالد اور پاپولیشن کونسل کی کنٹری ڈائریکٹر ڈاکٹر زیبا اے ستار کے درمیان ملاقات میں کیا گیا۔

انہوں نے خواتین کی تولیدی صحت بہتر بنانے،شرح پیدائش پر قابو پانے اور نوزائیدہ بچوں کی صحت یقینی بنانے کے لئے اقدامات کرنے کا فیصلہ کیا۔

فریقین نے محکمہ صحت کے صوبائی اعلی حکام کے ساتھ مشاورت کی ضرورت پر بھی اتفاق کیا تاکہ تولیدی صحت،شرح پیدائش پر کنٹرول اور نوزائیدہ بچوں کی دیکھ بھال کے لئے اقدامات کو فروغ دیا جاسکے۔

انہوں نے بے نظیر نشوونما مراکز کے قریب پاپولیشن کونسل ڈیسک قائم کرنے کی تجویز پر بھی تبادلہ خیال کیا جہاں خواتین کو صحت سے متعلق امور کے بارے میں ضرور ی آگاہی اور رہنمائی تک رسائی فراہم کی جائے گی۔