پاکستان اور چین نے علاقائی امن واستحکام کے قیام ، باہمی احترام اور مفاہمت کو فروغ دینے اور یکطرفہ اقدامات اورتسلط پسندانہ پالیسیوں کی مشترکہ طورپر مخالفت کی ہے ۔
یہ اتفاق رائے نائب وزیراعظم اور وزیرخارجہ سینیٹر محمد اسحق ڈار اورچین کے وزیر خارجہ وانگ ژی کے درمیان اتوار کے روز ٹیلی فون پر گفتگو کے دوران ہوا ۔
گفتگو کے دوران سینیٹر محمد اسحق ڈار نے چین کے وزیرخارجہ وانگ ژی کو خطے کی موجودہ صورتحال کے بارے میں آگاہ کیا انہوں نے واشگاف الفاظ میں بھارت کے یکطرفہ اور غیرقانونی اقدامات کے علاوہ پاکستان کے خلاف اس کے بے بنیاد پراپیگنڈے کو یکسر مستردکیا۔
چین کی مستقل اورغیرمتزلزل حمایت کی بھرپور تعریف کرتے ہوئے نائب وزیراعظم نے پاکستان اور چین کی مضبوط دوستی اور مستقل تزویراتی شراکت داری کیلئے پاکستان کے مضبوط عزم کا اعادہ کیا۔
